قصة حقيقيه مؤثرة

كانوا ذى بقيت الاطفال بيتمنوا اللعبه والحاجه الحلوه
واكيد حضن امهم
كانوا تلاثه اخوات تقى ومحمد وتسنيم
كانوا ماشاء الله ادب الدنيا فيهم عمرهم ما بصوا على
حد بياكل قدامهم ولا طفل ماسك حاجه حلوه
عوديتهم الام على القناعه وعيب نبص على حد بياكل
زرعت فيهم الامانه والادب
ولو راحوا مع امهم عند اى جاره وحطوا الاكل
عمرهم مايمدوا ايديهم
وتحلفلى امهم انهم يكونوا لسه واكلين
عيش وملح وتحسبهم اغنياء من التعفف
بجد ربنا كان سترها معاهم لوبصيتى لهم من اول نظره تقولى اغنياء وبتحلف الام انهم طول شهر رمضان بيتسحروا ويفطروا
فول وطعميه
كبرت تسنيم وكانت من الاوائل وشفت شهادتها بعينيه ومحمد الصغير كل اللى كانت تتمناه امه انه يحفظ القران لكن خدت على نفسها عهد اول ما يكمل 4سنين هتوديه للشيخ يبتدى معاه التحفيظ ومش مهم الفلوس كانت بتقولى لو هشتغل طول النهار والليل بس يحفظ القران ولكن شاء الله ان يموت محمد قبل هذه الامنيه العظيمه
مش عايزه اقولكم على جمالهم تسنيم كان شعرها اصفر سايح وبياض سبحان الخلاق العظيم ومحمد كمان كان بياض الدنيا فيه رحمه الله عليهم.
ذى كل يوم نزلت الام على شغلها وسابتهم لرب العباد

اختهم الكبيره كانت فى 5ابتدائى حضرت لاخواتها الاكل

ونزلت على الدرس واتصلت تسنيم بامها وكانها بتودعها
ماما انا نجحت عايزه حاجه حلوه وانتى جايه ومحمد كمان بيقولك نفسه فى التفاح.
طبعا الام المسكينه موعدتهمش قالت ربنا يسهل
بعد ساعه من الاتصال رجعت تقى من الدرس بتخبط على اخواتها وتخبط لكن مفيش فايده استنجدت بالجيران
قعدوا يخبطوا وفى الاخر كسروا الشقه
لكن لاسف دخلت الاخت المسكينه علشان
تشوف اخواتها لاقيتهم ميتين .
تسنيم حاولت تقوم بدور الام وتحمى اخوها
قفلت وراها باب الحمام لان الدنيا ساقعه ولكن لاسف
من كتر البخار اتقفل الحمام واتزنق وحاولت اكيد تفتحه
ولكن ضعيفه ..اتخنقوا الطفلان شالوهم بسرعه الجيران على امل انهم يكونوا عايشين ولكن
الدكتور قال البقاء لله
صرخت اختهم لا مش ممكن هو ليه مفيش حد بيعيش
لان قبل كده مات ليها اخين بعد الولاده
خدوهم تانى على البيت لاحسن يشرحوهم
كانت كل المشكله ازاى يوصلوا الخبر للام قالولها تعالى اصل
الاولاد تعبانين شويه ولكن بقلب الام حسيت ان الموضوع اكبر
وجت بسرعه الطلق ومقلكوش كل ام وديت ولادها عند اى قريبه بعيد لان الام حقانيه لما تشوف الغلط متسكتش وصوتها كان عالى جدا فخفنا على ولادنا يتخضوا لو صوتت
وفعلا وصلت الام وكل النساء فى البلكونات ينتظروها علشان ينزلوا يصبروها واول ما نزلت قاعدت تسال ولادى ولادى ايه اللى حصلهم وتنادى على كل جاره باسمها وفى الاخر لاقيتنى فى وشها وقالتلى ماتوا صح كلهم ماتوا رديت قولتلها لا والله بس ربنا يصبرك قامت ساجده مكانها على الارض..
طلعت فوق بس منعوها من الدخول على اولادها خو فا عليها
لكن اصرت تشفهم وقالتلى بعد كده انها كل اللى كان فى دماغها انهم كانوا عملو حمام فتغيرلهم وتغطيهم علشان ميتيبسوش ويعرفوا يغسلوهم
سبحان الله هوه ده كل اللى كان قى دماغها
الاغرب انها بتحلفلى انها لما دخلت عليهم لاقيتهم عادى اكنهم نايمين وقالت لتسنيم بالله عليكى لو حاسه بيها ادينى علامه بتحلف ان عينيها الشمال فتحت وقفلت تانى
وقعدنا حواليها كلنا نبكى ونصبرها
اللى فكراه انها بتقول ملحقتش اجيبلهم البسبوسه والتفاح
وقامت على الغسل وساعدت كمان وقالت لتسنيم وهيه على الغسل متخفيش يا تسنيم ذى ما كنت مش ببص عليكى فى الدنياو مش هبص عليكى دلوقتى وبتحلف ان تسنيم كانت حاطهاايديها على العوره وبعد الغسل فكت ايديها ورجعت لمكانها تانى .
سبحان الله الام دى ادتنا درس قى الايمان والصبر على البلاء عمرنا مهننساه
ويوم الجنازه عمرى ما هنسى صوتها مش فى الصويت تصوروا كانت بتقول ايه ....لا اله الا الله محمد رسول الله
وتكررها واحنا نعيط

سالتها حلمتى بيهم قالتلى كتير
مره حلمت بمحمد اللى كان نفسها تحفظه القران
انه بقى شاب كبير وبيحفظ القران
وتسنيم بقت ذى العروسه
تعرفوا بتقولى ايه قبل الوفاه بيوم تسنيم قالتلها
ماما انا لو مت هخاف اوى من نظره العتاب بتاعه ربنا ليه
خرج محمد فى نفس الوقت وقالها انا كمان نفسى احفظ القران مع سيدنا ابراهيم
وحلمت الام قبليها باسبوع ان فى ميه بارده نزلت من بقها
ولما سالت الشيخ عبده عوض قالها دى السكينه والصبر ربنا نزلهم عليها
مش عايزه اقولكم الست الصابره دى علمتنا ايه عن الصبر والايمان الحقيقى

والاعظم من كده رحمت ربنا بيها سنها عدى الاربعين وربنا كرمها بتميم ولد ما شاء الله وسبحان الله لما ببصله بشوف تسنيم ومحمد هيه بتقولى شايفه ربنا كريم ازاى وعوضنى بتميم شبهم بالظبط.

سابت البيت وسكنت فى حته تانيه بتقولى مش قادره اقعد فى الحته اللى اتربوا فيها فى كل حته ذكرى وجواب من تسنيم
وكل ما تيجى زياره تطلع وتنزلى وتترمى فى حضنى ونقعد نعيط احنا الاثنين *وبتقولى انها مش بتعيط علشان ماتوا هى بتعيط علشان وحشوها ونفسها تشوفهم *
انا اسفه انى وجعت قلبكم لكن الست دى
ليها حق عندى وهى طلبت منى الدعاء.
انا عارفه انها قصه حزينه ومؤثره وفات عليها3سنين ومش قادره انساها وكتبتها للعظه
ولازم نطلع بحاجه من الموضوع ده
اننا لازم نشكر ربنا على كل حاجه فى حياتنا ومش كل واحده عندها مشكله من زوج ولا حماتها ولا جارتها يبقى ده نهايه العالم ...صدقونى حضنك لاولادك دا بالدنيا ولا نعمه الصحه اللى ربنا انعم بيها عليكى.
لازم نصبر على البلاء ونشكر ربنا على كل شىء
وعايزه اقول الحذر لا يمنع القدر ولكن ناخد بلاسباب
ادعو الله ان يبارك فى اولادى واولادكم
ويصبر قلب كل ام مبتلاه
#ولازم يا جماعه #
* نحاول نسال على بعض.
*ونخرج من اموالنا الصدقات اللى تعين المحتاجين على تربيه اولادهم.
*ونحاول على اد ما نقدر منسيبش
اولاد سن صغير لوحدهم وننزل ونسيبهم.
المهم يا جماعه انا كلمتها امبارح وقولتلها
تطلبى ايه من الموقع اللى هنشر فيه قصه اولادك طلبت الدعاء قولتلها متقلقيش الموقع اللى بكتب فيه كلهم قلبهم رحيم وهيدعولك من قلبهم
متكسفونيش وعايزه المو ضوع يتقفل من كتر الدعاء
(اللهم بارك لها فى اولادها وزوجها وارزقها عمره او حج )
هو ده الدعاء اللى نفسها تدعولها بيه فارجو منكم الدعاء لهذه الام المكلومه فى اولادها واسال الله ان يصبرها ويجعلها هى واولادها فى الجنه امييييييييييييييييين
وجزاكم الله كل خير واسفه للاطاله .
ياريت يا جماعه متبخلوش عليها بالدعوه وتقيموا والله مش علشانى علشان خاطر الام دى اللى علمتنا الصبر.واملى فى ربنا ان يتقبل دعائنا .
نفسى يتثبت ويبقى كل اللى يقراه يدعى للام دى بارك الله فيكم .وفى اولادها
ربنا يرحمهم

(سبحان الله وبحمده سبحان ربى العظيم)
منقوووووووول للامانه

جزاكى الله خيرآ على هذه القصة المؤثرة.